മടി മാറി

അന്നൊരു വ്യാഴാഴ്ച , ദേവൂട്ട്യേം  കൊണ്ട് കരാട്ടെ ക്ലാസ്സില്‍ പോകുന്നു. അവിടെ parking ആണ് വലിയ പാട്. നേരത്തെ ചെന്നില്ലേല്‍ ഒരു മൈല്‍ ദൂരെ ഒക്കെ parking കിട്ടൂ. ഈ വയറും വെച്ച് നടക്കാന്‍  കല്യാണിക്കുട്ടിക്ക് മടി. അത് കൊണ്ട് നേരത്തെ എത്തി. കരാട്ടെ ക്ലാസിനു മുന്‍പില്‍ parking കിട്ടിയില്ല . പകരം കരാട്ടെ ക്ലാസ്സിനോട് ചേര്‍ന്നുള്ള Dental clinic-നു മുന്‍പില്‍ അതാ ഒരു പാര്‍ക്കിംഗ് space. സന്തോഷത്തോടെ അവിടെ എത്തിയപ്പോള്‍ അത് disabled ആള്‍ക്കാര്‍ക്കായിട്ടുള്ള space ആണ്. അപ്പോഴാണ്‌ എന്‍റെ  കണ്ണ് തുറന്നത് ആ parking space-ന്നു നേരെ opposite ഒരു parking! പക്ഷെ compact parking ആണ് (അതായത് ചെറിയ കാര്‍ പാര്‍ക്ക്‌ ചെയ്യാനുള്ള സ്പേസ്). എന്‍റെ  ഗമഗണ്ടന്‍ വണ്ടി അതിവിദഗ്ധമായി  അവിടെ പാര്‍ക്ക്‌ ചെയ്തു ഞാനും ദേവൂട്ടിയും  കരാട്ടെ ക്ലാസ്സില്‍ എത്തി.

ഒരു മണിക്കൂര്‍ ഉള്ള ക്ലാസ്സിനോക്കെ ഇപ്പൊ രണ്ടു മണിക്കൂര്‍ ദൈര്‍ഖ്യം തോന്നുന്നു. എന്തായാലും ക്ലാസ്സ്‌ കഴിഞ്ഞു ഞങ്ങള്‍ കാറിനു അടുതെത്തി. ഇപ്പോഴും ആ dental clinic-നു  മുന്‍പിലുള്ള  disabled parking  space ഒഴിഞ്ഞു കിടക്കുന്നു.   ഞാന്‍ ദേവൂട്ടിക്കു back  door തുറന്നു കൊടുത്തു. അവള്‍ അകത്തു കേറിയപ്പോള്‍ ഞാന്‍ front  door തുറന്നു. ങേ! ഞാന്‍ ഞെട്ടി ... എനിക്ക് അകത്തേക്ക് കേറാന്‍ പറ്റുന്നില്ല. ഇറങ്ങുമ്പോള്‍ കുഴപ്പില്ലായിരുന്നെല്ലോ! നോക്കിയപ്പോള്‍ side-ലെ വണ്ടി മാറിയിരിക്കുന്നു, പോയപ്പോള്‍ ഉള്ള വണ്ടി അല്ല തിരിച്ചു വന്നപ്പോള്‍. ഞാന്‍ വലത്തേക്ക് ഇത്തിരി angle-ല്‍ കേറാന്‍ ശ്രമിച്ചു, ഇല്ല നടക്കുന്നില്ല, ഇടത്തേക്ക് തിരിഞ്ഞു കേറാന്‍ നോക്കി.. ഇല്ല രക്ഷയില്ല. ഇപ്പൊ 90 ഡിഗ്രി തിരിഞ്ഞു നോക്കി, അതും ഫലിച്ചില്ല... പിന്നെ  പല പല ആംഗിള്‍ പരീക്ഷിച്ചു നോക്കി, ഇല്ല...ഞാനും എന്‍റെ വയറും കൂടി ഒന്നിച്ചു കാറില്‍ കേറില്ല. അവസാനം പുറകോട്ടു തിരിഞ്ഞും  ഒരു ശ്രമം നടത്തി... No രക്ഷ...തണുപ്പത്ത് ഞാന്‍ നിന്ന് വിയര്‍ത്തു.

പെട്ടന്ന് എന്‍റെ കുരുട്ടു ബുദ്ധി പ്രവര്‍ത്തിച്ചു തുടങ്ങി. Plan  B - passanger door -ല്‍ കൂടി കേറിയിട്ടു ഡ്രൈവര്‍ seat -ല്‍ എത്തുക. ഞാന്‍ passanger ഡോര്‍ തുറന്നു , അവിടെയും സ്ഥിതി അത് തന്നെ. വീണ്ടും പ്രയത്നം ... പല angle-ല്‍  ... ഏതോ ഒരു angle-ല്‍ ഞാന്‍ കുറച്ചു കേറി. ഒന്നൂടെ ശ്രമിച്ചു, ഇപ്പൊ ഞാന്‍ അങ്ങോട്ടുമില്ല ഇങ്ങോട്ടുമില്ല.  "കൃഷ്ണാ!!!..."  ഞാന്‍ അറിയാതെ വിളിച്ചു പോയി. കാറിനു അകത്തു നിന്ന് ഒരു കുഞ്ഞു ശബ്ദം "അമ്മാ, common, you  can  do   it!" . ഇല്ല മോളെ, അമ്മക്ക് do  ഇറ്റാന്‍ പറ്റുന്നില്ല. ഒരു തരത്തില്‍ എങ്ങനെയൊക്കെയോ ഞാന്‍ എന്നെ തന്നെ ഊരി എടുത്തു.

അണച്ചും കിതച്ചും ഞാന്‍ കാറിനു പുറകില്‍ എത്തി .  ഏതോ ഒരു പാട്ടില്‍ പറയുന്ന പോലെ  "ഇളിഭ്യനായ്‌ വിഷണ്ണനായി ഏകാന്തനായ് ഞാന്‍ നിന്നു...".

  

അങ്ങനെ ആ പറഞ്ഞ പോലൊക്കെ നില്‍ക്കുമ്പോള്‍ അതാ ആ dental office-ല്‍ നിന്നും ഒരു സായിപ്പ് ഇറങ്ങി വരുന്നു, എന്‍റെ കാറിന്‍റെ  ഇടതു side-ല്‍ ഉള്ള കാറില്‍ കേറി reverse  എടുത്തു നീങ്ങുന്നു. ഹാവു.... ഞാന്‍ ഓടി എന്‍റെ കാറില്‍ കേറി reverse എടുത്തു opposite  side -ലേക്ക്  പോയി. Main road-ലേക്ക് കേറാന്‍ സിഗ്നല്‍ ഇട്ടു നില്‍ക്കുമ്പോള്‍ വെറുതെ side mirror-ല്‍ ഒന്ന് നോക്കി, അതാ reverse എടുത്തു നീങ്ങിയ ആ കാര്‍ വീണ്ടും അവിടെ തന്നെ പാര്‍ക്ക്‌ ചെയ്തു ആ സായിപ്പ് എന്‍റെ കാറിലേക്ക് നോക്കി ചിരിച്ചു കൊണ്ട്  Dental clinic-ലേക്ക് നടന്നു കേറുന്നു!!!

വാല്‍ കഷ്ണം: കല്യാണിക്കുട്ടി  ആ dental clinic-ന്‍റെ  ഏഴു  അയലോക്കത്ത്‌   ഇനി   വണ്ടി  പാര്‍ക്ക്‌  ചെയ്യില്ല. ഒരു  മൈല്‍  എങ്കില്‍  ഒരു  മൈല്‍  ദൂരെ   പാര്‍ക്ക്‌   ചെയ്തിട്ട്  തല വഴി  പുതച്ചു  കരാട്ടെ    ക്ലാസ്സില്‍   എത്തും. നടക്കുന്നത് ആരോഗ്യത്തിനു  നല്ലത് എന്ന് പറയുന്നത്  എത്ര  ശെരി!.

കൂട്ടുകാരെ... നാട്ടുകാരെ... ആരെങ്കിലും   facebook-ലോ,  youtube-ലോ ഇതേ പോലുള്ള അതി  സാഹസികമായ   video  കണ്ടാല്‍  അത്  ഈ  കല്യാണിക്കുട്ടി  ആയി  തോന്നുന്നെങ്കില്‍  തികച്ചും    യാദൃശ്ചികം  മാത്രം!

But, Why Acha Why???

( ദേവൂട്ടിയുടെ ക്രിക്കറ്റ്‌ commentary )

കുളിമുറിയുടെ വാതിലില്‍ മുട്ടിക്കൊണ്ട് 

ദേവൂട്ടി : " അച്ഛാ, green guy out ആയി."

അച്ഛന്‍  : "ങേ! ശെരിക്കും out ആണോ ?"

ദേവൂട്ടി : " Blue guys hug ചെയുന്നുണ്ട്. പിന്നെ 5 എന്ന് എഴുതി കാണിക്കുന്നുണ്ട്."

അച്ഛന്‍ : "ആണോ മോളെ! എന്നാ ഔട്ട്‌ ആയി... ഹേയ്...".

അല്‍പ നേരം കഴിഞ്ഞ് വീണ്ടും കതകില്‍ മുട്ട്...

ദേവൂട്ടി : "അച്ഛാ, blue guys  two times hug ചെയ്തു, പക്ഷെ green guy out  ആയില്ല."

അച്ഛന്‍  : "അത് out ആയിരുന്നു കാണില്ല മോളെ".

ദേവൂട്ടി : "But അച്ഛാ, blue guys TWO TIMES hug ചെയ്തു, still എന്താ green guy out ആവാഞ്ഞേ???"

March of Amma

കല്യാണിക്കുട്ടി അത്യാവശ്യം വയ്യാഴികയും വലിയ വയറുമായി നടക്കുന്നു. ഈ ഒരു പ്രതിഭാസത്തിന്റെ കൂടെ package deal ആയി കിട്ടുന്ന ചെറിയ തോതില്‍ പല ഭാഗത്തായുള്ള വേദനകളും കൂടെ ആവുമ്പോള്‍ പരമസുഖം!


അങ്ങനെയിരിക്കെ ഒരു ദിവസം ദേവൂട്ടി school-ഇല്‍ നിന്നും വലിയ ഒരു booklet-മായി വരുന്നു. വന്നയുടനെ കൊണ്ടുവന്ന സംഭവത്തെക്കുറിച്ച് കുത്തും കോമയുമില്ലാതെ വര്‍ണിക്കല്‍ലായി .  സംഭവം "Arctic region and animals live there" ആണ്. കൊള്ളാം... എത്ര നന്നായാണ് കുട്ടികള്‍ക്ക് കാര്യങ്ങള്‍ പഠിപ്പിച്ചു കൊടുക്കുന്നത്, അതും പാട്ടും കളികളിലൂടെയും! ഞാന്‍ ആകെ impressed ആയി.

എന്നാ ഇനി എന്റെ വകയായും ഇരിക്കട്ടെ കുട്ടിക്ക് കൂടുതല്‍ അറിവ്, ഞാന്‍ "March of the Penguins" എന്ന ഡോകുമെന്ററി ഇട്ടു കൊടുത്തു. ആഹാ എത്ര രസം മഞ്ഞു മൂടി കിടക്കുന്ന Arctic region കാണാന്‍! ദാ വരുന്നു ഒരു പറ്റം penguins. അവര്‍ അതാ മാര്‍ച്ച്‌ ചെയ്തു മാര്‍ച്ച്‌ ചെയ്തു വാലെ വാലെ നടന്നു പോകുന്നു. എന്താ cute  ആ തതക്കോ പതക്കോ എന്ന നടപ്പ് കാണാന്‍, ഞാന്‍ അതിങ്ങനെ ആലോചിച്ചിരിക്കുമ്പോള്‍ ദേവൂട്ടിയുടെ comment, "Look Amma, looks like thousands of Amma marching through the snow!" ഞാന്‍ ഒന്ന് ഞെട്ടി TV-ല്‍ നോക്കി. Penguin-ഉം ഞാനുമായി എന്ത് ബന്ധം! ഈ ജീവിയെ zoo-ഇല്‍ കണ്ടിട്ടുണ്ടെന്നല്ലാതെ യാതൊരു രക്തബന്ധവും ഞങ്ങള്‍ തമ്മിലില്ല. സത്യം . "എന്താ മോളെ അങ്ങനെ പറഞ്ഞെ" എന്ന് ചോദിച്ചപ്പോള്‍ "Amma, they are waddling just like you". ഞാന്‍ വീണ്ടും ഒന്ന് നോക്കി, ങേ അത് അത്ര നല്ല നടപ്പല്ലല്ലോ!

 ഞാന്‍ ദേവൂട്ടിയോടു ചോദിച്ചു "What!!! Do I walk like them???"   . ദേവൂട്ടി പെട്ടന്ന് എന്‍റെ അടുത്ത് വന്നു എന്നെ സമാധാനിപ്പിക്കുന്ന പോലെ പുറത്തു തട്ടിക്കൊണ്ടു പറഞ്ഞു "No Amma, I didnt mean that. I meant THEY ARE WALKING JUST LIKE YOU!"

വാല്‍കഷ്ണം: കല്യാണിക്കുട്ടി  ഇപ്പൊ  നല്ല  നടപ്പ്  പരിശീലിക്കുന്നു. 

കല്യാണിക്കുട്ടിയും വിശുദ്ധനും!

പ്രീ ഡിഗ്രി അഡ്മിഷന്‍ കാര്‍ഡും കൊണ്ട് Principal- ന്‍റെ റൂമില്‍ നിന്നും ഇറങ്ങി അഭിമാനത്തോടെ ഞാന്‍ ചുറ്റും വീണ്ടുമൊന്നു കണ്ണോടിച്ചു. ആഹാ.. എത്ര പ്രകൃതി രമണീയമായ സ്ഥലം! കണ്ണെത്താ ദൂരത്തോളം റബ്ബര്‍ മരങ്ങള്‍!!! അതിനിടയില്‍ ഒരു കുന്നിന്റെ മുകളിലായി തലയെടുപ്പോടെ നില്‍ക്കുന്ന വനിതാ കോളേജ്!!! ആ കോളേജിന്റെ മുറ്റത്തിന്റെ നടുവിലായി രണ്ടു കൈയും ഉയര്‍ത്തി നില്‍ക്കുന്ന ഒരു പുണ്യാളന്റെ പ്രതിമ! പാവം... ഇത്രയും അധികം പെണ്‍പിള്ളാരുടെ ഇടയില്‍ ആകെ ഉള്ള പുരുഷ പ്രജയായി ഇദ്ദേഹം മാത്രം. തലയില്‍ കൈ വെയ്ക്കാന്‍ പോകുമ്പോള്‍ ആരോ "Statue !!!" പറഞ്ഞപോലെ ആണ് കക്ഷിടെ നില്‍പ്പ്. കോളേജില്‍ നിന്നും ഒന്ന് ചാടിയാല്‍ മതി ഹോസ്റ്റലില്‍ എത്താന്‍. അവിടെയും കേറി, ഹോസ്റ്റല്‍ വാര്ടെന്‍ Mother Mercy- യെ കണ്ടു സംസാരിച്ചു. എനിക്ക് എല്ലാം ഇഷ്ടായി... ഞാന്‍ ഇവിടെ ഒരു കാസറ് കസറും. മനസ്സില്‍ പറഞ്ഞു കൊണ്ട് അവിടെ നിന്നും ഇറങ്ങി. വീണ്ടും പുണ്യാളനെ നോക്കി , ഒരു ചെറിയ യാത്ര പറയല്‍.

അങ്ങനെ ആ സുദിനം ആഗതമായി. പെട്ടിയും കിടക്കയുമെടുത്തു ഞാന്‍ നാളെ യാത്രയാവുന്നു. ഹോസ്റ്റല്‍ ജീവിതം എന്ന സ്വപ്നം യാഥാര്‍ത്ഥ്യം ആകാന്‍ പോകുന്നു. രാവിലെ തന്നെ ഉണര്‍ന്നു റെഡിയായി , അച്ഛന്റെയും അമ്മയുടെയും കാലില്‍ വീണു. അനുഗ്രഹം മേടിചെന്നോ അതോ ചെയ്യാനിരിക്കുന്ന പാപങ്ങള്‍ക്ക്‌ നേരത്തെ ക്ഷെമ മേടിചെന്നോ അതിനെ വ്യാഖ്യാനിക്കാം. എന്തായാലും ആ പറഞ്ഞത് മേടിച്ചു ഞാന്‍ എന്റെ രണ്ടു വര്‍ഷത്തെ ഹോസ്റ്റല്‍ ജീവിതം തുടങ്ങി. അമ്പലവും ചുറ്റുപാടും അമ്പലത്തിന്റെ school - ലുമായി കളിച്ചു വളര്‍ന്ന എനിക്ക് ആ പുണ്യാളനും അദ്ധേഹത്തിന്റെ കോളേജും ഹോസ്റെലും ശീലങ്ങളും എല്ലാം പുതുതായിരുന്നു.

എല്ലാം കാര്യമായി തന്നെ ഞാന്‍ വീക്ഷിച്ചു പഠിച്ചു. എല്ലാ വ്യാഴാഴ്ചയും non-catholics- ഉം catholics-ന്റെ കൂടെ chapel-ലില്‍ പോകണം എന്നത് Mother Mercy-ക്ക് നിര്‍ബന്ധം. അന്നേ ദിവസം ഏതേലും non-catholics-നെ കൊണ്ട് ബൈബിള്‍ വായിപ്പിക്കുക എന്നൊരു അതി ക്രൂരമായ വിനോദം കൂടി ഉണ്ടായിരുന്നു Mother Mercy-ക്ക്. എനിക്ക് എന്തോ ബൈബിള്‍ വായിക്കുന്ന ആ tune നന്നേ ഇഷ്ടായി. അധികം താമസിയാതെ എന്റെ ഊഴം വന്നു. ഭാഗവതം എടുത്തു കണ്ണില്‍ വയ്ക്കുന്ന പോലെ ഞാന്‍ ബൈബിള്‍ ഒക്കെ എടുത്തു കണ്ണില്‍ വെച്ച് ഭക്തിയോടെ ആരംഭിച്ചു. പണ്ടേ ആളുകളെ അനുകരിക്കുന്ന ഒരു ശീലം ഉള്ളത്  കാരണം ഞാന്‍ Mother Mercy- ടെ ശബ്ദം അനുകരിചായിരുന്നു പാരായണം .

അങ്ങനെ അങ്ങനെ വായിച്ചു വായിച്ചു വന്നപ്പോള്‍ ദാ ഒരു "വി. പത്രോസ് ", ഞാന്‍ ഒന്നൂടെ നോക്കി, അതെ "വി. പത്രോസ് " തന്നെ. ങേ! പണ്ടും initials ഒക്കെ ഉണ്ടായിരുന്നോ!!! ആദ്യം ഒന്ന് പരുങ്ങിയെങ്കിലും പിന്നെ ഒട്ടും അമാന്തിക്കാതെ പാരായണം തുടര്‍ന്നു ..." V. പത്രോസ് ....". ആ page മുഴുവന്‍ V. പത്രോസ് -നെ കുറിച്ചായിരുന്നെന്നു തോന്നുന്നു. വേറെ ഒന്നും മനസ്സിലായില്ലെങ്കിലും V. പത്രോസ് ഏതോ വലിയ പുള്ളി ആണെന്ന് മാത്രം മനസ്സിലായി, അല്ലേല്‍ പിന്നെ Bible-ല്‍ ഒക്കെ V. പത്രോസ്നെ കുറിച്ച് എഴുതുമോ! ഞാന്‍ നല്ല ഈണത്തില്‍ നീട്ടിയും കുറുക്കിയും വായിച്ചു തീര്‍ന്നു.

Chapel time കഴിഞ്ഞു പുറത്തേക്കു ഇറങ്ങുമ്പോള്‍ ഒരു hindu ആയ ഞാന്‍ ഇത്രയും നന്നായി bible വായിച്ചതിനെ എല്ലാരും പ്രശംസിക്കുന്ന രംഗമോര്‍ത്തു രോമാന്ജ കന്ജുകയായി. പുറത്തു ഇറങ്ങിയപ്പോള്‍ ഞാന്‍ പ്രതീക്ഷിച്ച പോലെ ആയിരുന്നില്ല കാര്യങ്ങള്‍ എന്ന് പ്രത്യേകം പറയേണ്ടല്ലോ! ഞാന്‍ ഒരു question mark പോലെ നിന്നപ്പോള്‍ അതാ ഒന്ന് ചിരിച്ചു കാണാന്‍ ബുദ്ധിമുട്ടുള്ള Mother Mercy ഓടി വന്നു എന്നെ കെട്ടി പിടിച്ചു പൊട്ടി ചിരിക്കുന്നു. ഇടയ്ക്കു ഇടയ്ക്കു V. പത്രോസ് , V. പത്രോസ് എന്നു പിച്ചും പേയും  പറയുന്നുമുണ്ട്. ഹോ Mother Mercy-ക്ക് ഇഷ്ടായി... ഇഷ്ടായി... ഞാനും തിരിച്ചും കെട്ടിപിടിച്ചു.

എന്തിനു അധികം പറയേണ്ടു, ആ Bible പാരായണത്തോടെ എനിക്ക് കോളേജില്‍ വളരെ "നല്ല പേരായി", "V. Pathrose" !!!

വിശുദ്ധ പത്രോസിനു ഈ കല്യാണിക്കുട്ടിയുടെ ഉപകാര സ്മരണ 

കല്യാണിക്കുട്ടി എന്ന പിന്നണി ഗായിക!

"കാക്ക തൂറി ... ന്നാ തോന്നുന്നേ.. "

ഏതാണ്ടിതേ പോലെ ഒരു ഡയലോഗ് ഏഴാം ക്ലാസ്സില്‍ വെച്ച് ഞാന്‍ പറഞ്ഞുപോയി. ഏകദേശം ഒരു വര്‍ഷത്തിനുള്ളില്‍ ഇറങ്ങിയ "ഇന്‍ ഹരിഹര്‍ നഗര്‍"എന്ന സിനിമയ്യില്‍ ജഗദീഷ് എന്റെ ഡയലോഗ് കോപ്പി അടിച്ചോ എന്ന് പോലുംസംശയിക്കേണ്ടിയിരിക്കുന്നു.

സ്കൂള്‍ യൂത്ത് ഫെസ്റിവല്‍ സമയം അടുക്കുന്നു. ക്ലാസ്സ്‌ ടീച്ചര്‍ ലളിത ടീച്ചര്‍ക്ക്‌വാശി, നമ്മള്‍ക്ക് variety വേണം. അതിനു ടീച്ചര്‍ കണ്ടു പിടിച്ച പരിപാടി അല്പം കടന്നതെങ്ങിലും എല്ലാരും കയ്യടിച്ചു പാസ്സാക്കി. ശ്രീജ ആന്‍ഡ്‌ ഗ്രൂപ്പ്‌ ഡാന്‍സ്ചെയ്യും, പിന്നണിയില്‍ ഞാനും കൃഷ്ണപ്രിയയും പാടും!!! "പിന്നണിയോ????അതെന്തു കുന്തം എന്ന് ആലോചിച്ചതോര്‍ത്തു ഇന്ന് ലജ്ജിക്കുന്നു.

ടീച്ചര്‍ തന്നെ പാട്ടും കണ്ടു പിടിച്ചു, യാത്ര സിനിമയിലെ "ഹോയ് രേരെ ..."

സ്റ്റേജില്‍ പാടാനുള്ള പേടി ടീച്ചറെ അറിയിച്ചപ്പോള്‍ പിന്നെയും പറയുന്നു "പിന്നണി" എന്ന്. ഓ... അപ്പൊ പിന്നില്‍ നിന്ന് പാടിയാ മതിലോ എന്ന് സമാധാനിച്ചു പ്രാക്ടീസ് തുടങ്ങി. ഡാന്‍സ് ഗംഭീരമാകുന്നുണ്ട്, പക്ഷെ പാട്ട്!!! യൂത്ത് ഫെസ്റിവല്‍ അടുക്കാരായിട്ടും പാട്ട് അങ്ങ് ശെരിയാവുന്നില്ല. എന്തോ പ്രശ്നം ഉണ്ടെന്നല്ലാതെ എനിക്കോ കൃഷ്ണപ്രിയക്കോ അത് സോള്‍വ്‌ ചെയ്യാന്‍ അറിയത്തുമില്ല.

ഒരു ദിവസം ലഞ്ച് ടൈം കഴിഞ്ഞു പ്രശ്ന പരിഹാരത്തിന് ഞാന്‍ കൃഷ്ണപ്രിയയെ നിര്‍ബന്ധിച്ചു വലിച്ചു മ്യൂസിക്‌ ടീച്ചറിന്റെ അടുത്ത് പോയി. ഞാനും പ്രിയയും പാടി, ടീച്ചര്‍ അന്തം വിട്ടിരിക്കുന്നു. ടീച്ചര്‍ പറഞ്ഞു എന്റെ പിച്ച് അങ്ങ് മേലെയും പ്രിയയുടെ ഇങ്ങു താഴെയുമാണെന്ന്! പാട്ട് പഠിച്ചിട്ടില്ലാത്ത ഞങ്ങള്‍ക്ക് പിച്ച് എന്ന് കേട്ട് എന്ത് മനസ്സിലാകാന്‍??? രാവിലെ biology ക്ലാസ്സില്‍ ഇന്ദിര ടീച്ചര്‍ പറഞ്ഞത് എത്ര വാസ്തവം!!! നമ്മുടെ തലയോടിലെ അനങ്ങാന്‍ പറ്റുന്ന ഏക എല്ല് "താടി എല്ല്" ആണത്രേ! ദേ, എന്റെ താടി എല്ല് തൂങ്ങി ആടുന്നു! എന്തായാലും മ്യൂസിക്‌ ടീച്ചറിന്റെ നല്ലൊരു പിച്ച് കിട്ടിയതോടെ എന്റെയും പ്രിയയുടെയും പിച്ച് ഏകദേശം ഒരു പോലെയായി. സമാധാനം.

ലളിത ടീച്ചര്‍ക്ക്‌ ഐഡിയ കൊണ്ട് ഇരിക്കാന്‍ പറ്റാത്ത അവസ്ഥയായി. ഡാന്‍സിനു ഒരു കൊഴുപ്പ് കിട്ടാന്‍ പല്ലവി കഴിഞ്ഞു tamborine-ഇല് ഗാപ്‌ ഇട്ടു നാല് കൊട്ട്, ആ ടൈമില്‍ നര്‍ത്തകിമാര്‍ ഗ്രൂപ്പ്‌ ആയി നാല് വത്യസ്ഥ പോസുകള്‍! എന്തായാലും പ്രാക്ടീസ് കണ്ടു ക്ലാസ്സിലെ ബാക്കി കുട്ടികള്‍ പറഞ്ഞു ഫസ്റ്റ് നമുക്ക് തന്നെ! കോസ്ടുമിലും വേണം ടീച്ചര്‍ക്ക്‌ വ്യത്യസ്തത! എല്ലാ ക്ലാസ്സിലെയും കുട്ടികള്‍ പട്ടു പാവാടയും ബ്ലൌസും ഇട്ടു ഡാന്‍സ് ചെയുമ്പോള്‍ നമ്മള്‍ 7A- ക്കാര്‍ സെറ്റും മുണ്ടും ധരിച്ചു വേണമത്രേ ഡാന്‍സ് ചെയ്യാന്‍! അതെല്ലാം പോട്ടെ ,പിന്നണിക്കാര്‍ ഞങ്ങളും ഉടുക്കണം സെറ്റും മുണ്ടും!!! ആദ്യമായി സെറ്റും മുണ്ടും ഉടുക്കാന്‍ കിട്ടിയ chance അല്ലെ, എന്തിനാ ടീച്ചറെ ഞങ്ങള്‍ പിന്നണിക്കാര്‍ അത് ഉടുക്കുന്നെ എന്ന് ചോദിക്കാന്‍ തോന്നിയെങ്കിലും ചോദിച്ചില്ല.

അങ്ങനെ യൂത്ത് ഫെസ്റ്റ് ഡേ ആയി. അടുത്തത് ഞങ്ങള്‍ 7A-ക്കാരുടെ ഡാന്‍സ്. ലളിത ടീച്ചര്‍ നര്‍ത്തകികളെ അവരുടെ positions -ഇല് നിര്ത്തുന്നു. ഞങ്ങള്‍ പിന്നണിക്കാര്‍ സൈഡ് curtain-ന്‍റെ പുറകില്‍ സ്ഥാനം പിടിച്ചു. നര്‍ത്തകികളുടെ കാര്യം ശെരിയായപ്പോള്‍ ടീച്ചര്‍ ധാ ഓടി ഞങ്ങളെ രണ്ടു പേരെയും കഴുത്തില്‍ പിടിച്ചു പൊക്കി സ്റ്റേജ്-ന്‍റെ സൈഡ്-ല്‍ കൊണ്ട് നിര്‍ത്തി. "അയ്യോ! ടീച്ചറെ ... ഞങ്ങള്‍ വെറും പിന്നണി ആണ്..." എന്നൊക്കെ പറഞ്ഞു കൂവുംബോഴേക്കും കര്‍ട്ടന്‍ തുറന്നു. പെട്ടന്ന് പ്രതീക്ഷിക്കാതെ സ്റ്റേജ്-ലും , ഇത്രയും സദസ്യരേയും എല്ലാം ഒന്നിച്ചു കണ്ടപ്പോള്‍ എന്റെ താടി എല്ല് പശ വെച്ച് ഒട്ടിച്ച പോലെയായി. ഹൃദയമിടിപ്പ്‌ tamborine-ന്‍റെ ശബ്ധതെക്കാളും മുഴുക്കെ കേള്‍ക്കാന്‍ തുടങ്ങി. ഞാന്‍ പ്രതിമ പോലെ നില്‍പ്പാണ്.

Audience പതിയെ കൂവി തുടങ്ങിയപ്പോള്‍ പ്രിയ എനിക്ക് ഒരു പിച്ച് തന്നു. ധാ, ഞാന്‍ തുടങ്ങി "അയ്യോരെ ഹോയ ര ഹോയ്യെ...". പ്രിയയും കൂടെ പാടി. ഞൊടി യിടക്കുള്ളില്‍ പല്ലവി കഴിഞ്ഞു. ഇനി tamborine-ഇല് 4 കൊട്ട്. അതും മാല പടക്കം പോലെ തീര്‍ന്നു, അനുപല്ലവി- ചരണം- പല്ലവി. ഹ്ഹോ.. ഞങ്ങള്‍ പാടി ഫിനിഷ് ചെയ്തിരിക്കുന്നു. ഒരു ദീര്‍ഖ ശ്വാസം വിട്ടു ഞങ്ങള്‍ നിന്നു. സദസ്സില്‍ കൂട്ട ചിരി. കര്‍ട്ടന്‍ ഇടേണ്ട ആള് തല തല്ലി ചിരിക്കുന്നു. എന്തോ പന്തികേട്‌ തോന്നി ഞാനും പ്രിയയും നോക്കിയപ്പോള്‍, അതാ നര്‍ത്തകിമാര്‍ ഒരു മാതിരി കോമരം തുള്ളി കഴിഞ്ഞ കണക്കെ... ചിലരുടെ മുണ്ട് ഉരിഞ്ഞു പോയിരിക്കുന്നു, ചിലരുടെ മുടി പറിഞ്ഞു പോയിരിക്കുന്നു, ചിലര്‍ ശ്വാസം കിട്ടാതെ നിലത്തിരിന്നു "വെള്ളം.. വെള്ളം.." എന്ന് അലറുന്നു.

ഞാന്‍ പതിയെ പറഞ്ഞു "സ്പീട് അല്പം കൂടി.. ന്നാ... തോന്നുന്നേ...". സ്റ്റേജ്-ല്‍ കര്‍ട്ടന്‍ വീഴുന്നതോടെ എന്‍റെ "കഥ" തീരുന്നു.

ശേഷം ചിന്ത്യം .

ന്നാലും ന്‍റെ mixie-ടെ അടപ്പേ!!!

Cook ചെയ്യാന്‍ പറഞ്ഞതിന്‍റെ പേരില്‍ ഞാന്‍ തല്ലി പോട്ടിച്ചതാണ് എന്ന് പരക്കെ അഭ്യുഹം ഉണ്ടെങ്കിലും സത്യം അങ്ങനെ അല്ല. പൊട്ടി, അത്രേ ഉള്ളൂ. ഇതൊക്കെ ആരോട് പറയാന്‍!!!

നിങ്ങള്‍ എങ്കിലും വിശ്വസിക്കൂ... നാട്ടുകാരെ, ഈ വീട്ടുകാരീടെ mixie-ടെ അടപ്പ് വളരെ നിര്‍ഭാഗ്യകരമായി താഴെ വീണു ഉടഞ്ഞു പോയി. കഴിഞ്ഞ ഒരു വര്‍ഷം ആ പൊട്ടിയ അടപ്പ് ഇടയ്ക്കിടയ്ക്ക് M-Seal വെച്ച് ഒട്ടിച്ചു ഒട്ടിച്ചു എന്‍റെ seal തീര്‍ന്നു, എന്നു മാത്രമല്ല അതുമായുള്ള യുദ്ധത്തില്‍ അടപ്പ് രണ്ടു കഷ്ണമാവുകയുംച്ചെയ്തു. അടപ്പ് ഒരു പ്രത്യേക രീതിയില്‍ ലോക്ക് ആവാതെ ഇനി പ്രവര്‍ത്തിക്കുകയില്ല എന്ന് പ്രഖ്യാപിച്ചു mixie വിദ്വാനും സമരതിലായി.അടുക്കള പ്രവര്‍ത്തന രഹിതമാവാന്‍ ഇനിയും വേറെ കാരണം വേണ്ടല്ലോ!. ഇപ്പ്രാവശ്യം നാട്ടില്‍ പോയപ്പോള്‍ അടപ്പ് മാറ്റി മേടിക്കാന്‍ പോയതാണ് ഈ കുറിപ്പിന്‍റെ പ്രചോദനം!

നാട്ടില്‍ വളരെ പേര് കേട്ട ഒരു electronic കടയിലേക്ക് ഞാനും എന്‍റെ ഭര്‍ത്താവും ഈ പറഞ്ഞ mixie-ടെ പൊട്ടിയ അടപ്പുമായി കയറി ചെന്നു. അഹാ... വളരെ നല്ല സ്വീകരണം... ഞങ്ങളുടെ ആഗമനഉദ്ദേശ്യം കട ഉടയോടു അറിയച്ചു. ദാ വരുന്നു ഒരു യുവ കോമളന്‍, ഒരു പയ്യന്‍. അവന്‍ നല്ല ചിരിയോടെ എന്നോട് ചോദിക്കുന്നു, : " ഏതു mixie ആണ് മോളെ ? "

(വെറും 25-26 വയസ്സ് തോന്നിപ്പിക്കുന്ന ചെറുക്കന്റെ മോള് വിളി കേട്ടത് കൊണ്ടാണോ എന്നറിയില്ല ഞാന്‍ വിശദമായി explain ചെയ്തു . )

ഞാന്‍: "Sumeet. അടപ്പ് കൊണ്ട് വന്നിട്ടുണ്ട്. കല്യാണം കഴിഞ്ഞ ഉടനെ മേടിച്ചതാ... Mixie-ക്ക് കുഴപ്പം ഇല്ല. അടപ്പ് മാത്രം കിട്ടിയാല്‍ മതി."

Bag-ല്‍ നിന്നും അടപ്പ് തപ്പി എടുത്തു കൊടുക്കുന്നു. അതിനിടെ ഭര്‍ത്താവിനെ തോള് കൊണ്ട് ഒന്ന് തട്ടി "കണ്ടോടെ " എന്ന style-ല്‍ നില്‍ക്കാന്‍ ഞാന്‍ മറന്നില്ല.

കടയിലെ പയ്യന്‍ അടപ്പ് ഒന്ന് നോക്കി, പിന്നെ എന്നെ നോക്കി : "ഇത് ജാമ്പവാന്‍റെ കാലത്തെ ആണെല്ലോ! ഈ model തന്നെ ഇപ്പൊ ഇല്ല. ന്നാ വേറെ mixie നോക്കട്ടെ? "

ഞാന്‍ ശെരി എന്ന് ദയനീയമായി തല ആട്ടി.

പയ്യന്‍ അപ്പുറത്ത് നിന്ന ഒരു പെങ്കോചിനോട് : "ദെ ഈ ആന്‍റിക്ക് പുതിയ mixie കാണിച്ചു കൊടുത്തെ" .

"ആന്‍റി...... ആന്‍റി......ആന്‍റി.....ആന്‍റി....." ഏതോ പരസ്യത്തില്‍ കേട്ട പോലെ അതിങ്ങിനെ എന്‍റെ കാതുകളില്‍ അലയടിച്ചപ്പോള്‍ എന്‍റെ side-ല്‍ നിന്നും അടക്കിയ ഒരു ചിരി ശബ്ദവും.

ആ മോള് വിളി ഒന്ന് ശെരിക്കും ആസ്വദിക്കുന്നതിനു മുന്‍പേ വന്ന ആഖാതത്തില്‍, കാറിന്‍റെ front seat-ല്‍ കൈയ്യില്‍ 4300 രൂപയുടെ bill-ഉം പിടിച്ചു ഞാന്‍ പിറുപിറുത്തു "...ന്നാലും ന്‍റെ mixie-ടെ അടപ്പേ!!!" .

അമ്മ റെഡി!

ദേവുനു മൂന്നു വയസു പ്രായം. ചില് ചിലാ എന്ന് ചിലച്ചു നടപ്പാണ് കക്ഷിയുടെ ഇഷ്ട വിനോദം. അതെല്ലാം ആസ്വദിച്ചു ഞങ്ങളും.

അങ്ങനെ ഒരു ശനിയാഴ്ച ദിവസം നടന്ന സംഭവം...

ഞങ്ങളുടെ ഒരു friend-നു കുഞ്ഞു ഉണ്ടായി, അതിനു 2 മാസം പ്രായവുമായി. അവര്‍ അടുത്ത ദിവസം നാട്ടിലേക്ക് പോകുന്നു 2 മാസത്തേക്ക്. ആ കുഞ്ഞു ജനിച്ച സമയം കാണാന്‍ പോകുമ്പോള്‍ കൊടുക്കാനായി മേടിച്ചു വെച്ച gift ദാ ഇപ്പോഴും ഇവിടിരിക്കുന്നു. ഇനി എങ്കിലും അത് കൊടുത്തില്ലെങ്കില്‍, ശോ വെറുതെ ആയി പോവില്ലേ!!! ഞാന്‍ exclamatory mark ഇട്ടു പല പ്രാവശ്യമായി പറയുന്നു, പക്ഷെ ആര് കേള്‍ക്കാന്‍!!! എന്നും office-ലെ ജോലി അധികമായതിനെ ചീത്ത വിളിക്കുന്ന എന്റെ ഭര്‍ത്താവ് അന്ന് relax ചെയ്ത് ആദ്യമായി TV എന്ന സാധനം കാണുന്ന പോലെ മെഴുഗസ്യാ എന്ന് രാവിലെ മുതല്‍ ഇരിപ്പാണ്. ഞാനോ രാവിലെ മുതല്‍ ആ കുഞ്ഞിനെ കാണാന്‍ പോകുന്നത് ഓര്‍മിപ്പിച്ചു കൊണ്ട് പുറകെയും.

ഉച്ച ആയപ്പോള്‍ ഞാന്‍ പറച്ചില്‍ നിര്‍ത്തി. പെട്ടന്ന് എന്തോ background music നിന്ന പോയ ലക്ഷണത്തില്‍ കക്ഷി മുഖത്തേക്ക് ഒരു ചോദ്യ ചിഹ്നമെരിഞ്ഞു. ഞാന്‍ mind ചെയ്യാതെ പോകുവാനുള്ള തയ്യാറെടുപ്പുകള്‍ തുടങ്ങി. ആദ്യം ഞാന്‍ ഒരുങ്ങി, പിന്നെ ദേവുട്ടിയെ ഒരുക്കി. ഞാന്‍ പറയുന്നതിനല്ലേ വില ഇല്ലാതുള്ളൂ... ഞാന്‍ ദേവുട്ടി-യോടു പറഞ്ഞു " മോള്‍ അച്ഛനോട് പോയി പറയൂ , അമ്മക്ക് ഇന്ന് baby-യെ കാണാന്‍ പോകണം, ഇപ്പൊ പോയാലെ കാണാന്‍ പറ്റു. ദാ അമ്മ റെഡി ആയി, മോളും റെഡി ആയി, ഇനി അച്ഛന്‍ വേഗം വന്നു റെഡി ആവു.. എന്ന്".

എല്ലാം മനസ്സിലായ പോലെ തല കുലുക്കി അവള്‍ step ഇറങ്ങി താഴെ ചെന്ന് അച്ഛനോട് പറയുന്നു , " അച്ഛാ , അമ്മക്ക് baby വേണം, ഇപ്പൊ വേണം. അമ്മ റെഡി ആയി bathroom-ല്‍ നില്‍പ്പുണ്ട്. അച്ഛന്‍ വേഗം റെഡി ആവാന്‍ അമ്മ പറഞ്ഞു" !!!